خطبة: "يا أم خالد هذا سنا" (باللغة الأردية)

اے ام خالد! کیا ہی خوبصورت لباس ہے

پہلا خطبہ

الحمد لله أحاط بكل شيء خبرًا، وجعل لكل شيء قدرًا، وأسبغ على الخلائق من فضله سترًا، أحمده سبحانه وأشكره وأتوب إليه وأستغفره، وأشهد أن لا إله إلا الله وحده لا شريك له، وأشهد أن سيدنا ونبينا محمدًا عبده ورسوله، بعثه إلى الناس كافة عذرًا ونذرًا، صلى الله وسلم وبارك عليه، وعلى آله وصحبه والتابعين ومن تبعهم بإحسان.

حمد وثنا کے بعد!

میں آپ کو اور اپنے آپ کو اللہ کا تقوی اختیار کرنے کرنے کی وصیت کرتا ہوں:

﴿ يَا أَيُّهَا الَّذِينَ آمَنُواْ اتَّقُواْ اللّهَ وَابْتَغُواْ إِلَيهِ الْوَسِيلَةَ وَجَاهِدُواْ فِي سَبِيلِهِ لَعَلَّكُمْ تُفْلِحُونَ ﴾ [المائدة: 35].

ترجمہ: مسلمانو! اللہ تعالی سے ڈرتے رہو اور اس کا قرب تلاش کرو اور اس کی راہ میں جہاد کرو تاکہ تمہارا بھلا ہو۔

رحمن کے بندو!سیرت نبویہ کے مطالعہ سے ایمان کو تقویت ، محاسن اخلاق کو غذا اور دل کو شرح وکشادگی حاصل ہوتی ہے، آج ہماری گفتگو کا موضوع نبی ﷐ کا وہ واقعہ ہے جو ایک بچی کے ساتھ پیش آیا، ہم حدیث روایت کرنے سے قبل ان کی نشو ونما سے متعلق بعض تفصیلات بھی آپ کی خدمت میں پیش کردیتے ہیں، ان کا نام ہے: امۃ بنت خالد بن سعید بن العاص، ان کے والد نے   بچپن میں ہی ان کی کنیت "ام خالد " رکھ دی تھی، ان کی ولادت حبشہ میں ہوئی، اور والدین کے ساتھ اجنبی ملک میں اللہ اور اس کے رسول کی خاطر ہجرت کی زندگی گزارتے ہوئے انہوں نے ہوش سنبھالا۔

امام بخاری نے ام خالد امۃ بنت خالد بن سعید بن العاص رضی اللہ عنہا سے روایت کیا ہے، وہ کہتی ہیں: رسول اللہ ﷐ کے پاس کچھ کپڑے لائے گئے جن میں ایک سیاہ شال بھی تھی۔ آپ ﷐نے فرمایا: "تمہارے خیال کے مطابق یہ شال کسے دی جائے؟ " صحابہ کرام خاموش رہے تو آپ نے فرمایا: "ام خالد کو میرے پاس لاؤ" ۔چنانچہ مجھے نبی ﷐ کی خدمت میں پیش کیا گیا پھر آپ نے مجھے وہ شال اپنے ہاتھ سے پہنائی اور دعا فرمائی: "اسے پرانا اور بوسیدہ کرو"۔یعنی دیر تک جیتی رہو۔ آپ نے دو مرتبہ دعا فرمائی۔پھر آپ اس شال کے نقش ونگار دیکھنے لگے اور اپنے ہاتھ سے میری طرف اشارہ کرکے فرمایا: "اے ام خالد! سناہ" سناہ یہ حبشی زبان کا لفظ ہے جس کے معنی" کیا ہی خوبصورت " کے ہیں۔

راوی حدیث اسحاق نے کہا: میرے اہل خانہ میں سے ایک عورت نے مجھ سے بیان کیا کہ اس نے ام خالد پر وہ شال دیکھی تھی۔

بخاری کی دوسری روایت میں یہ الفاظ آئے ہیں: "پھر میں مہرِ نبوت سے کھیلنے لگی تو میرے والد نے مجھے ڈانٹ پلائی، اس پر رسول اللہ ﷐ نے فرمایا: "اس کو چھوڑ دو" ۔پھر فرمایا: "کرتا پرانا کرو اور اسے پہن کر پھاڑو۔ پھر کرتاپرانا کرو اور پھاڑو۔پھر کرتا پرانا کرو اور پھاڑو" (یعنی آپ نے درازی عمر کی دعا فرمائی)۔

عبد اللہ بن مبارک بیان کرتے ہیں کہ: وہ قمیص اتنی دیر تک باقی رہی کہ زبانوں پر اس کا چرچا ہونے لگا۔

ایمانی بھائیو! آئیے ہم ٹھہر کر اس خوشنما منظر   پر ذرا غور وفکر کریں!

۱-نبی ﷐ کو اتنا وقت کیسے مل جاتا کہ آپ صحابہ کرام کی نہایت ہی خاص زندگی سے بھی دلچسپی لیتے، یہاں تک کہ ان کے بچوں کو خوش کرنے ، ان کے دلوں میں فرحت ومسرت پہنچانے، بچوں کے ساتھ ان کی ا س بے پناہ خوشی میں شامل ہونے کی بھی آپ کو فکر دامن گیر رہتی جو ہماری نگاہوں میں ان کی معمولی چیزوں سے انہیں حاصل ہوتی ، جبکہ وہی چیزیں ان کی نظر میں بڑی تھیں!

آپ دیکھیں کہ آپ ﷐ ام خالد کو خود سے کپڑا پہناتے ہیں، پھر اس کے نقش ونگار کو دیکھتے ہیں اور اس کی طرف اشارہ کرتے ہوئے ان سے فرماتے ہیں: سنا سنا، جس کے معنی حبشی زبان میں خوبصورت کے ہیں، یہ وہی زبان ہے جس کے ساتھ ام خالد کی نشو ونما ہوئی۔

آپ ﷐ کی زندگی میں فرصت اور فراغت نہیں تھیں اور نہ ہی ذمہ داریوں کی کمی تھی، بلکہ آپ سب سے بڑی ذمہ داری کو ادا کر رہے تھے اور سب سے بھاری امانت آپ کے کندھوں پر ڈالی گئی تھی،   لیکن اخلاق ِمحمدیہ کی عظمت کے میزان میں ان چیزوں کو بھی اہمیت حاصل تھی، کیوں کہ آپ کو اس لئے مبعوث کیا گیاتاکہ آپ انسانوں کو دنیا وآخرت کی سعادت وفرحت سے بہرہ ور کریں، اور آپ نے اپنی امت کو بھی یہ رہنمائی فرمائی کہ یہ بھی ایک نیکی ہے کہ: "کسی مسلمان کے دل میں خوشی پہنچاؤ" (البانی نے اسے حسن کہا ہے)۔

۲- ایک اچھے کام کو مختلف خوبصورت کاموں کے خوشبودار گلدستہ میں تبدیل کرنے کی نبوی مہارت ، جس کا آغاز نبی ﷐ نے اس سوال کے ذریعہ کیا کہ یہ لباس کسے دیا جائے، جس سے اس کی اہمیت اور انتخاب کا پتہ چلتا ہے، یہی وجہ ہے کہ وہ لباس، فخر اور اعزاز میں تبدیل ہوگیا۔ پھر آپ ﷐ نے اس بچی کو اپنے پاس بلایا تاکہ وہ اسے آپ کے ہاتھ سے حاصل کرنے کا شرف حاصل کرسکے، اس لئے آپ نے اس کے پاس کپڑا بھیجا نہیں، حالانکہ وہ کمسن تھی! چنانچہ بخاری کی روایت ہے کہ: "میرے پاس ام خالد کو پیش کرو، چنانچہ آپ کی خدمت میں ان کو اٹھا کر لایا گیا"۔

پھر آپ ﷐ نے خود سے ان کو کپڑا پہنایا۔

اسی پر بس نہیں کیا بلکہ ان کی دلجوئی بھی اور ان کی طفلانہ خوشی میں شریک بھی ہوئے۔

پھر آپ نے ان کو دعادی اور بار بار دعا دی، پھر ان کو اپنے قریب کیا، یہاں تک کہ جب ان کی نظر آپ کے دونوں مونڈھوں کے درمیان مہر نبوت پر پڑی تو اس سے کھیلنے لگی۔

پھر آپ نے اسے کھیلنے بھی دیا اور جب ان کے والد نے ان کو ڈانٹا تو آپ نے فرمایا: اسے چھوڑ دو۔

یقیناً یہ ایسا نبوی درس ہے جو یہ واضح کرتاہے کہ خیر وبھلائی کے کام جہاں سخاوتِ نفس سے عبارت ہیں ، وہیں وہ ایک فن اور حسن ِادا بھی ہیں!

کیسے کیسے اخلاق کریمہ اور کیسی نیک پسند طبیعت ان مجالس کو اپنے آغوش میں لئے رہتی تھی! اللہ ہمیں اپنی عزت اور رحمت کے گھر میں ان کے ساتھ جمع کرے۔

اللہ تعالی مجھے اورآپ کو کتاب وسنت سے فائدہ پہنچائے، اس میں جو ہدایت اور حکمت کی بات ہے،اسے ہمارے لئے مفید بنائے، اللہ سے مغفرت طلب کریں ، یقیناً وہ خوب معاف کرنے والا ہے۔

دوسرا خطبہ

الحمد لله وكفى، وسلام على عباده الذين اصطفى.

حمد وصلاۃ کے بعد:

اس خوش نما منظر کا تیسرا فائدہ یہ ہے:

۳-ممکن تھا کہ نبی ﷐ وہ شال ام خالد کے پاس بھیج دیتے اور کافی ہوتا، لیکن آپ نے یہ عمل خود سے انجام دیا اور پوری تفصیل کے ساتھ انجا م دیا، تاکہ لوگوں کو خوشی پہنچانا نبی ﷐ کی سنت قرار پائے ،جس کی پیروی کی جائے اور اللہ اور یوم آخرت پر ایمان لانے والوں اور کثرت سے اللہ کا ذکر کرنے والوں کے لئے یہ سنت خوبصورت نمونہ بن کر قائم ودائم رہے، یہی وجہ ہے کہ آپ کو سیرت نبوی ﷐  میں اس خوبصورت منظر کے بیش بہا نمونے مل جائیں   گے ، جو اس عمدہ خصلت پرزور ڈالتے اور ا س منظر کے معانی (ہمارے سامنے ) بار بار دہراتے ہیں۔

۴-بچوں کے ساتھ پیش آنے کا جو عمدہ نبوی طریقہ ہے ، اس کے کئی مناظر ہیں ، جن میں سے چند یہ ہیں:

أ-شرح صدر کے ساتھ استقبال کرنا، اپنائیت کا اظہار اور دلجوئی کرنا۔

ب-قریب ہونا اور بچی کے ساتھ محبت وہمدردی کا مظاہرہ کرنا، بایں طور کہ وہ آپ سے اتنی قریب ہوئی کہ ان کا ننہا سا ہاتھ مہر نبوت سے کھیلنے لگا۔

ح-نرمی ومہربانی کاالتزام، سختی اور ڈانٹ ڈپٹ سے اجتناب۔

پانچواں فائدہ:بچوں کی اسی طرح عزت افزائی کی جائے جس طرح ان کے والد کی جائے، ان کے والد کے جذبات کیا رہے ہوں گے جب وہ دیکھ رہے ہوں گے کہ رسول اللہ ﷐ ان کی صاحبزادی کو شال پہنا رہے ہیں، ان کے ساتھ دلجوئی کررہے ہیں ، ان کو دعائیں دے رہے ہیں اور ان کو ڈانٹ پلانے سے منع کر رہےہیں...!

ایک اہم بات یہ بھی ہے کہ:(اس حدیث سے ) نبی ﷐کا ایک معجزہ بھی ظاہر ہوتا ہے، وہ یہ کہ آپ کی دعا: "کرتا پرانا کرو اور اسے پہن کر پھاڑو۔ پھر کرتاپرانا کرو اور پھاڑو۔پھر کرتا پرانا کرو اور پھاڑو"۔یعنی آپ نے درازی عمر کی دعا فرمائی، تو اس کا اثر بھی ظاہر ہوا، چنانچہ ام خالد رضی اللہ عنہا سب سے اخیر میں وفات پانے والی صحابیہ ہیں۔

آخری فائدہ یہ کہ:احسان فراموش نہیں کیا جا سکتا، انہیں اپنے بچپن میں یہ خوشی کا لمحہ حاصل ہوا (کہ نبی ﷐ نے ان کوشال پہنایا)، لیکن یہ واقعہ ان کی یادداشت میں نقش اور ان کے شعور میں پیوست ہوگیا ، جسے وہ لوگوں کے پاس بیان کیا کرتی تھی، بلکہ وہ لباس بھی ان کے پاس محفوظ رہا اور اس کا رنگ پھیکا پڑنے کے بعد بھی وہ اس کی حفاظت کرتی رہی ۔

صلى الإله على الحبيب بفضله

وحباه قدرا في الأنام عظيما

يا أيها الراجون منه شفاعة

صلوا عليه وسلموا تسليما

الله تعالی اپنے فضل وکرم سے حبیب (مصطفی ﷐) پر درود نازل فرمائے۔

ان کو تمام انسانوں میں عظیم مقام ومرتبہ سے سرفراز فرمائے۔

اے وہ لوگو! جن کو آپ ﷐ سے شفاعت کی امید ہے

آپ پر درود وسلام بھیجتے رہو۔